يا جماعة، اليوم نبي نتكلم عن شغلة هي الفرق بين المتداول اللي محفظته في نمو، وبين اللي محفظته “مكانك سر”. الموضوع هو الالتزام بتأمين الصفقة أول بأول.
ليش التأمين ضروري؟
لما تحلل الشارت، وتنتظر منطقتك، والسعر يمشي معاك مثل ما توقعت، اهني يجي دورك الاحترافي:
تأمينك مو خوف من الخسارة: لازم تفرق بين إنك “خايف” وبين إنك “ما تبي تخسر”. التأمين يعني إنك تحترم تحليلك وتحمي مجهودك.
الصفقة اللي تبي تخسرك.. اتركها: إذا السعر رجع لنقطة دخولك بعد ما مشى في طريق الأهداف، فهذا يعني إن “عزم” الحركة تغير. اترك الصفقة تطلعك على الدخول بسلام، والسوق دايم يعطي فرص ثانية.
التركيز على “صحّة” التحليل: تعلم إنك ما تفتكر في الربح والخسارة كأرقام كثر ما تفتكر إن تحليلك يكون صح وما يخسرك. لما يكون همك “دقة التنفيذ”، الأرباح بتجي تلقائياً كتحصيل حاصل.
اعتراف مني .. “المشاعر عدوّنا الأول”
على كثر ما أقول وأذكر الناس بهذا الموضوع، وعلى كثر ما أشدد على أهمية التأمين، إلا إن المشاعر أحياناً تخليني أنسى أو أتردد. التداول معركة نفسية مستمرة، والأهم هو إننا نتعلم من هذي اللحظات ونرجع للالتزام بقواعدنا فوراً.
💡 زبدة الكلام:
”التداول مو بس دخول صفقة، التداول هو ‘إدارة’ هذي الصفقة لين تطلع منها. لا تخلي طمعك أو أملك في ‘ضربة كبيرة’ يخليك تضحي بصفقة رابحة وتحولها لخسارة. أمن صفقتك، ريح بالك، وخلك قناص يحافظ على ذخيرة محفظته”.
